Waliouawa katika tukio la ugaidi Kenya wafikia 68

Idadi ya watu waliuliwa katika shambulio la kigaidi kwenye jengo la maduka la Westgate mjini Nairobi, Kenya imefikia 68. Shirika la Msalaba Mwekundu nchini humo limetangaza kuwa, idadi hiyo imeongezeka baada ya kupatikana miili ya watu wengine tisa na hivyo kuifanya idadi hiyo kufikia 68. Kwa mujibu wa vyanzo vya habari zaidi ya watu 200 wanaripotiwa kujeruhiwa katika tukio hilo. Hadi jana serikali ya Kenya ilikuwa imetangaza kuwa kwa akali watu wenye silaha wapatao 10 hadi 15 walikuwa bado wamo katika jengo hilo la biashara huku wakiendelea kuwashikilia watu wapatao 36. Jeshi la Kenya kwa kushirikiana na askari kutoka nje ya nchi hiyo, limetangaza kuwa, linafanya juhudi ya kuhakikisha linawatia mbaroni watu hao wenye silaha na kuwaokoa mateka wengine wanaoendelea kushikiliwa. Hii ni katika hali ambayo Waziri wa Mambo ya Ndani wa Kenya ametangaza kuwa watu wasiopungua elfu moja tayari wameokolewa hadi sasa. Wakati huo huo msemaji wa kundi la kigaidi la ash-Shabab ametoa taarifa  na kukiri  kuhusika kundi hilo na shambulizi hilo la Westgate huko Nairobi.